mujhe in sang-rezon ko guhar karna bhi aata hai

mujhe in sang-rezoñ ko guhar karnā bhī aatā hai

shab-e-tārīk ko nūr-e-sahar karnā bhī aatā hai

hamārī ḳhāmushī bhī maslahat ke taht hai varna

zamāne ko hameñ zer-o-zabar karnā bhī aatā hai

zamāna chhīn le ye aish-e-duniyā bhī to kyā ġham hai

mujhe to be-sar-o-sāmāñ guzar karnā bhī aatā hai

vo apnī manzil-e-maqsūd ik din pā hī jaate haiñ

jinheñ dushvār rāhoñ meñ safar karnā bhī aatā hai

ḳhushī kī chhāñv meñ rahne ke ham aadī to haiñ lekin

ġhamoñ kī dhuup meñ 'shādāñ' basar karnā bhī aatā hai

mujhe in sang-rezon ko guhar karna bhi aata hai

shab-e-tarik ko nur-e-sahar karna bhi aata hai

hamari KHamushi bhi maslahat ke taht hai warna

zamane ko hamein zer-o-zabar karna bhi aata hai

zamana chhin le ye aish-e-duniya bhi to kya gham hai

mujhe to be-sar-o-saman guzar karna bhi aata hai

wo apni manzil-e-maqsud ek din pa hi jate hain

jinhen dushwar rahon mein safar karna bhi aata hai

KHushi ki chhanw mein rahne ke hum aadi to hain lekin

ghamon ki dhup mein 'shadan' basar karna bhi aata hai