mujhe is zamin ki hai justuju na to aasman ki talash hai

mujhe is zamīñ kī hai justujū na to āsmāñ kī talāsh hai

jahāñ raqs kartī ho zindagī mujhe us jahāñ kī talāsh hai

mirā saath chhoḌ de ham-safar tirī raah hai abhī muḳhtasar

tujhe manziloñ kī hai justujū mujhe kārvāñ kī talāsh hai

maiñ bhaTak rahā huuñ ḳhalāoñ meñ ġham-e-zindagī kī sadāoñ meñ

ġham-e-bekarāñ meñ dharā hai kyā ġham-e-jāvedāñ kī talāsh hai

jo ravish ravish ko sañvār de jo kalī kalī ko nikhār de

jo chaman ko rang-e-bahār de usī bāġhbāñ kī talāsh hai

thī ajiib ġham kī vo dāstāñ jo mire laboñ pe na aa sakī

jo bikhar ga.ī hai varaq varaq usī dāstāñ kī talāsh hai

mujhe is zamin ki hai justuju na to aasman ki talash hai

jahan raqs karti ho zindagi mujhe us jahan ki talash hai

mera sath chhoD de ham-safar teri rah hai abhi muKHtasar

tujhe manzilon ki hai justuju mujhe karwan ki talash hai

main bhaTak raha hun KHalaon mein gham-e-zindagi ki sadaon mein

gham-e-bekaran mein dhara hai kya gham-e-jawedan ki talash hai

jo rawish rawish ko sanwar de jo kali kali ko nikhaar de

jo chaman ko rang-e-bahaar de usi baghban ki talash hai

thi ajib gham ki wo dastan jo mere labon pe na aa saki

jo bikhar gai hai waraq waraq usi dastan ki talash hai