mujhe jab shan-e-zabt-e-gham dikhane ka KHayal aaya

mujhe jab shān-e-zabt-e-ġham dikhāne kā ḳhayāl aaya

vufūr-e-dard meñ bhī muskurāne kā ḳhayāl aaya

mirī aahoñ ko ab ye gul khilāne kā ḳhayāl aaya

harīm-e-nāz meñ halchal machāne kā ḳhayāl aaya

tasavvur is liye chhoḌā hai un kī chashm-e-mai-gūñ kā

mujhe tauba pe apnī aañch aane kā ḳhayāl aaya

sahārā le rahā huuñ is liye maiñ ḳhud-kalāmī kā

mujhe apnā akelā-pan miTāne kā ḳhayāl aaya

na jaane kaun se aalam meñ hogā un kā dīvāna

use jis vaqt un ko bhuul jaane kā ḳhayāl aaya

ḳhirad-mandoñ kā koī kaam shāyad aa paḌā 'sābir'

unheñ ahl-e-junūñ ke naaz uThāne kā ḳhayāl aaya

mujhe jab shan-e-zabt-e-gham dikhane ka KHayal aaya

wufur-e-dard mein bhi muskurane ka KHayal aaya

meri aahon ko ab ye gul khilane ka KHayal aaya

harim-e-naz mein halchal machane ka KHayal aaya

tasawwur is liye chhoDa hai un ki chashm-e-mai-gun ka

mujhe tauba pe apni aanch aane ka KHayal aaya

sahaara le raha hun is liye main KHud-kalami ka

mujhe apna akela-pan miTane ka KHayal aaya

na jaane kaun se aalam mein hoga un ka diwana

use jis waqt un ko bhul jaane ka KHayal aaya

KHirad-mandon ka koi kaam shayad aa paDa 'sabir'

unhen ahl-e-junun ke naz uThane ka KHayal aaya