mujhe jism-o-jaan se na kar juda mujhe zehn-o-dil se miTa na de

mujhe jism-o-jāñ se na kar judā mujhe zehn-o-dil se miTā na de

mujhe de ke qurb kā hausla merī tishnagī ko baḌhā na de

mirī azmateñ merī rif.ateñ tirī den hī to haiñ a ḳhudā

mujhe lā ke bām-e-urūj par kahīñ pastiyoñ meñ girā na de

mire har qadam pe tū rakh nazar mirī raah kā tū ho pāsbāñ

mire naqsh-e-pā haiñ yahāñ vahāñ kahīñ koī un ko miTā na de

ye fasīl jis pe khaḌā hai tū ye fasīl-e-shahr-e-ġhurūr hai

mujhe ḳhauf hai yahī har ghaḌī koī is fasīl ko Dhā na de

vo charāġh jis se hai haq ayaañ vahī hogā rahbar-e-kārvāñ

koī jhoñkā bād-e-sumūm kā ise dekh aa ke bujhā na de

maiñ jafā karūñ tū vafā kare tū jafā kare maiñ vafā karūñ

yahī rasm rasm-e-vafā rahe ise mere dost bhulā na de

ai rafīq 'ārif'-e-ḳhasta-dil hai ye āḳhirī mirī iltijā

mujhe zindagī kī duā na de mujhe itnī saḳht sazā na de

mujhe jism-o-jaan se na kar juda mujhe zehn-o-dil se miTa na de

mujhe de ke qurb ka hausla meri tishnagi ko baDha na de

meri azmaten meri rifaten teri den hi to hain a KHuda

mujhe la ke baam-e-uruj par kahin pastiyon mein gira na de

mere har qadam pe tu rakh nazar meri rah ka tu ho pasban

mere naqsh-e-pa hain yahan wahan kahin koi un ko miTa na de

ye fasil jis pe khaDa hai tu ye fasil-e-shahr-e-ghurur hai

mujhe KHauf hai yahi har ghaDi koi is fasil ko Dha na de

wo charagh jis se hai haq ayan wahi hoga rahbar-e-karwan

koi jhonka baad-e-sumum ka ise dekh aa ke bujha na de

main jafa karun tu wafa kare tu jafa kare main wafa karun

yahi rasm rasm-e-wafa rahe ise mere dost bhula na de

ai rafiq 'arif'-e-KHasta-dil hai ye aaKHiri meri iltija

mujhe zindagi ki dua na de mujhe itni saKHt saza na de