mujhe kha hi gaya apnon ka gham aahista aahista

mujhe khā hī gayā apnoñ kā ġham āhista āhista

ye dil hotā gayā vaqf-e-alam āhista āhista

baḌhā.e jā.iye mashq-e-sitam āhista āhista

ye dil bhī ho chalā mānūs-e-ġham āhista āhista

ba-īñ-raftār niklegā tire iqbāl kā sūraj

ayaañ hotā hai jaise sub.h-dam āhista āhista

kabhī un kī taraf-dārī kabhī mujh se vafādārī

khulā jaatā hai ab un kā bharam āhista āhista

suneñge ab unhīñ do tiin shartoñ par mirā qissa

bayān-e-muḳhtasar ho kam se kam āhista āhista

kareñ is raaz kī uqda-kushā.ī āsmāñ vaale

gire jaate haiñ kyoñ pastī meñ ham āhista āhista

bhalā kyūñkar na uTh jaa.e vaqār-e-ādmī 'hasrat'

uThī duniyā se jab rasm-e-karam āhista āhista

mujhe kha hi gaya apnon ka gham aahista aahista

ye dil hota gaya waqf-e-alam aahista aahista

baDhae jaiye mashq-e-sitam aahista aahista

ye dil bhi ho chala manus-e-gham aahista aahista

ba-in-raftar niklega tere iqbaal ka suraj

ayan hota hai jaise subh-dam aahista aahista

kabhi un ki taraf-dari kabhi mujh se wafadari

khula jata hai ab un ka bharam aahista aahista

sunenge ab unhin do tin sharton par mera qissa

bayan-e-muKHtasar ho kam se kam aahista aahista

karen is raaz ki uqda-kushai aasman wale

gire jate hain kyon pasti mein hum aahista aahista

bhala kyunkar na uTh jae waqar-e-admi 'hasrat'

uThi duniya se jab rasm-e-karam aahista aahista