mujhe KHamosh rahna paD gaya hai

mujhe ḳhāmosh rahnā paḌ gayā hai

koī mujh meñ musalsal boltā hai

ḳhayāl-e-yār kā har ek rasta

tasavvur kī hadoñ se māvarā hai

pareshānī meñ bhī vo ḳhush hai shāyad

use darvesh-e-kāmil kī duā hai

ḳhabar tak ho nahīñ paatī kisī ko

vo yuuñ dil ke darīche kholtā hai

tumhārī yaad kā dil-doz jhoñkā

samā.at ke sabhī dar chīrtā hai

mohabbat ke jazīre ke makīno

yahāñ kī muḳhtalif āb-o-havā hai

musalsal ḳhvāb meñ har raat aa kar

koī merī jabīñ ko chūmtā hai

mire hamrāh mat chalnā ki aage

na manzil hai na koī rāsta hai

tumhāre yaad ke jhoñke se 'jāmī'

jabīñ par ik ajab sā bal paḌā hai

mujhe KHamosh rahna paD gaya hai

koi mujh mein musalsal bolta hai

KHayal-e-yar ka har ek rasta

tasawwur ki hadon se mawara hai

pareshani mein bhi wo KHush hai shayad

use darwesh-e-kaamil ki dua hai

KHabar tak ho nahin pati kisi ko

wo yun dil ke dariche kholta hai

tumhaari yaad ka dil-doz jhonka

samaat ke sabhi dar chirta hai

mohabbat ke jazire ke makino

yahan ki muKHtalif aab-o-hawa hai

musalsal KHwab mein har raat aa kar

koi meri jabin ko chumta hai

mere hamrah mat chalna ki aage

na manzil hai na koi rasta hai

tumhaare yaad ke jhonke se 'jami'

jabin par ek ajab sa bal paDa hai