mujhe kisi se kisi baat ka gila hi nahin

mujhe kisī se kisī baat kā gilā hī nahīñ

ki apne dil ke sivā koī mudda.ā hī nahīñ

tirā karam mire din kulfatoñ ke yuuñ guzre

mujhe lagā ki mire saath kuchh huā hī nahīñ

lahūluhān ho dil yā qalam ho sar jaanā

tirī galī ke sivā koī rāsta hī nahīñ

ki jis meñ phuul khileñ aur chaman mahak uThe

ye vo sahar hī nahīñ hai ye vo havā hī nahīñ

hai ḳhush-mizāj magar dil kī baat kaise kareñ

ki ek pal ko sahī vo kabhī khulā hī nahīñ

ajab haiñ ishq kī nāzuk-mizājiyāñ ya.anī

bujhā charāġh-e-mohabbat to phir jalā hī nahīñ

ye kyā jagah hai koī sun nahīñ rahā āvāz

pukārtā huuñ magar koī boltā hī nahīñ

mujhe kisi se kisi baat ka gila hi nahin

ki apne dil ke siwa koi muddaa hi nahin

tera karam mere din kulfaton ke yun guzre

mujhe laga ki mere sath kuchh hua hi nahin

lahuluhan ho dil ya qalam ho sar jaana

teri gali ke siwa koi rasta hi nahin

ki jis mein phul khilen aur chaman mahak uThe

ye wo sahar hi nahin hai ye wo hawa hi nahin

hai KHush-mizaj magar dil ki baat kaise karen

ki ek pal ko sahi wo kabhi khula hi nahin

ajab hain ishq ki nazuk-mizajiyan yani

bujha charagh-e-mohabbat to phir jala hi nahin

ye kya jagah hai koi sun nahin raha aawaz

pukarta hun magar koi bolta hi nahin