mujhe koi aisi ghazal suna ki main ro paDun

mujhe koī aisī ġhazal sunā ki maiñ ro paḌūñ

zarā jai jai vintī ke sur lagā ki maiñ ro paḌūñ

mire zabt tujh ko mirī taraf se ye izn hai

mirā aaj itnā to dil dukhā ki maiñ ro paḌūñ

ye jo ḳhaak oḌh ke so rahī hai mirī hañsī

yuuñ bilak bilak ke use jagā ki maiñ ro paḌūñ

mire ḳhud-kushī ke ḳhayāl par mire haal par

mirī bebasī mujhe yuuñ hañsā ki maiñ ro paḌūñ

tujhe ilm hai mirā koī tere sivā nahīñ

mujhe aa ke aise gale lagā ki maiñ ro paḌūñ

maiñ jahān-e-surḳh meñ sabz-posh charāġh huuñ

mirī lau ko itnā na aazmā ki maiñ ro paḌūñ

mirā baḳht merā nasīb tujh se chhupā nahīñ

mujhe de tū aisī koī duā ki maiñ ro paḌūñ

ye jo ishq kī siyah shaal hai ye vabāl hai

use yuuñ na dekh ke muskurā ki maiñ ro paḌūñ

mirī āñkheñ ab bhī tirī galī meñ haiñ ḳhema-zan

faqat ek baar unheñ dekh jā ki maiñ ro paḌūñ

mirā naam tū ne rakhā thā 'vāsif'-e-nā-tamām

isī naam se mujhe phir bulā ki maiñ ro paḌūñ

mujhe koi aisi ghazal suna ki main ro paDun

zara jai jai winti ke sur laga ki main ro paDun

mere zabt tujh ko meri taraf se ye izn hai

mera aaj itna to dil dukha ki main ro paDun

ye jo KHak oDh ke so rahi hai meri hansi

yun bilak bilak ke use jaga ki main ro paDun

mere KHud-kushi ke KHayal par mere haal par

meri bebasi mujhe yun hansa ki main ro paDun

tujhe ilm hai mera koi tere siwa nahin

mujhe aa ke aise gale laga ki main ro paDun

main jahan-e-surKH mein sabz-posh charagh hun

meri lau ko itna na aazma ki main ro paDun

mera baKHt mera nasib tujh se chhupa nahin

mujhe de tu aisi koi dua ki main ro paDun

ye jo ishq ki siyah shaal hai ye wabaal hai

use yun na dekh ke muskura ki main ro paDun

meri aankhen ab bhi teri gali mein hain KHema-zan

faqat ek bar unhen dekh ja ki main ro paDun

mera nam tu ne rakha tha 'wasif'-e-na-tamam

isi nam se mujhe phir bula ki main ro paDun