mujhe mile bhi to kyunkar mile KHabar meri

mujhe mile bhī to kyūñkar mile ḳhabar merī

ki maiñ vahāñ huuñ jahāñ ḳhud nahīñ guzar merī

sañbhālnā unheñ aape kā ho gayā mushkil

paḌī jab un pe mohabbat bharī nazar merī

nazar milāte bhī Dartā huuñ us se ab ki kahīñ

fuġhān-e-dard na ho jaa.e be-asar merī

kisī ke husn ke jalvoñ meñ kho gayā huuñ maiñ

ḳhudā ke vāste lā de koī ḳhabar merī

na jaane kab se sū-e-bām tak rahā thā maiñ

vo aa.e sāmne ko jhuk ga.ī nazar merī

mazā to jab hai ki nazroñ hī se samajh leñ vo

ki arz-e-shauq meñ zillat hai sar-basar merī

guzar bhī jaa.e guzarnā hai jo bhī ai 'sāhir'

ki aas toḌī hai zālim ne jaan kar merī

mujhe mile bhi to kyunkar mile KHabar meri

ki main wahan hun jahan KHud nahin guzar meri

sanbhaalna unhen aape ka ho gaya mushkil

paDi jab un pe mohabbat bhari nazar meri

nazar milate bhi Darta hun us se ab ki kahin

fughan-e-dard na ho jae be-asar meri

kisi ke husn ke jalwon mein kho gaya hun main

KHuda ke waste la de koi KHabar meri

na jaane kab se su-e-baam tak raha tha main

wo aae samne ko jhuk gai nazar meri

maza to jab hai ki nazron hi se samajh len wo

ki arz-e-shauq mein zillat hai sar-basar meri

guzar bhi jae guzarna hai jo bhi ai 'sahir'

ki aas toDi hai zalim ne jaan kar meri