مجھے نصیب اسی سے تو کچھ خوشی ہے نا

مجھے نصیب اسی سے تو کچھ خوشی ہے نا

لباس درد میں ملبوس زندگی ہے نا

دئیے لہو سے جلا کے جو میں نے رکھے تھے

گلی گلی میں تو گھر گھر میں روشنی ہے نا

قدم قدم پہ ملے ہیں جو درد کے لشکر

رخ حیات پہ پھر عکس بے بسی ہے نا

غم حیات تمہیں کس طرح نظر آئے

دل و نظر پہ جمی گرد گمرہی ہے نا

کبھی کبھی کوئی مجھ سے یہ پوچھ لیتا ہے

مکان دل میں وہ مہمان اجنبی ہے نا

مرا جو ایک ہی سجدہ قبول ہو جائے

مرے لئے تو وہ معراج بندگی ہے نا

یہ درد و کرب یہ حزن و ملال میں ڈوبی

بہت لطیف سی انورؔ کی شاعری ہے نا