mujhe nasib usi se to kuchh KHushi hai na

mujhe nasīb usī se to kuchh ḳhushī hai nā

libās-e-dard meñ malbūs zindagī hai nā

diye lahū se jalā ke jo maiñ ne rakkhe the

galī galī meñ to ghar ghar meñ raushnī hai nā

qadam qadam pe mile haiñ jo dard ke lashkar

ruḳh-e-hayāt pe phir aks-e-bebasī hai nā

ġham-e-hayāt tumheñ kis tarah nazar aa.e

dil-o-nazar pe jamī gard-e-gumrahī hai nā

kabhī kabhī koī mujh se ye pūchh letā hai

makān-e-dil meñ vo mehmān ajnabī hai nā

mirā jo ek hī sajda qubūl ho jaa.e

mire liye to vo merāj-e-bandagī hai nā

ye dard-o-karb ye huzn-o-malāl meñ Duubī

bahut latīf sī 'anvar' kī shā.erī hai nā

mujhe nasib usi se to kuchh KHushi hai na

libas-e-dard mein malbus zindagi hai na

diye lahu se jala ke jo main ne rakkhe the

gali gali mein to ghar ghar mein raushni hai na

qadam qadam pe mile hain jo dard ke lashkar

ruKH-e-hayat pe phir aks-e-bebasi hai na

gham-e-hayat tumhein kis tarah nazar aae

dil-o-nazar pe jami gard-e-gumrahi hai na

kabhi kabhi koi mujh se ye puchh leta hai

makan-e-dil mein wo mehman ajnabi hai na

mera jo ek hi sajda qubul ho jae

mere liye to wo meraj-e-bandagi hai na

ye dard-o-karb ye huzn-o-malal mein Dubi

bahut latif si 'anwar' ki shaeri hai na