mujhe paDho to paDho meri dastan se alag

mujhe paḌho to paḌho merī dāstāñ se alag

maiñ gulsitāñ meñ bhī yuuñ huuñ ki gulsitāñ se alag

ho koī vasl kā lamha ki hijr kā aalam

hijāb-e-shauq huā hai na darmiyāñ se alag

nuqūsh-e-sajda zamāna kahāñ talāsh kare

mirī jabīñ se judā tere āstāñ se alag

ye jāñ-navāz bahut hai vo kam-se-kam jāñ-soz

bahār se hai shikāyat judā ḳhizāñ se alag

hujūm-e-dard-o-alam dil ke saath thā 'nashtar'

ye kārvāñ bhī huā mīr-e-kārvāñ se alag

mujhe paDho to paDho meri dastan se alag

main gulsitan mein bhi yun hun ki gulsitan se alag

ho koi wasl ka lamha ki hijr ka aalam

hijab-e-shauq hua hai na darmiyan se alag

nuqush-e-sajda zamana kahan talash kare

meri jabin se juda tere aastan se alag

ye jaan-nawaz bahut hai wo kam-se-kam jaan-soz

bahaar se hai shikayat juda KHizan se alag

hujum-e-dard-o-alam dil ke sath tha 'nashtar'

ye karwan bhi hua mir-e-karwan se alag