mujhe puchha hai aa kar tumne us aKHlaq-e-kaamil se

mujhe pūchhā hai aa kar tum ne us aḳhlāq-e-kāmil se

ki maiñ sharminda ho kar rah gayā andāza-e-dil se

nazar ke ruḳh ko yā to dil kī jānib pher lene do

nahīñ to sāmne aa jaao uTh kar parda-e-dil se

umīdeñ uTh rahī haiñ saikḌoñ ummīdvāroñ kī

maiñ tanhā huuñ magar tanhā nahīñ uTThūñgā mahfil se

amīr-e-kārvāñ jis raushnī ke bal pe baḌhtā hai

nikaltā hai vo taarā sub.h hote ḳhāk-e-manzil se

unheñ duniyā ab ashk-e-ġham kahe yā ḳhuun kī būñdeñ

mohabbat ne charāġh āñkhoñ meñ lā kar rakh diye dil se

ab us nañg-e-mohabbat se kināra bhī to mushkil hai

mujhe jis kī mohabbat kā yaqīñ aayā thā mushkil se

abhī to shaam hai āġhāz hai parvāna-sozī kā

koī is sham.a ko āgāh kar do sub.h-e-mahfil se

abhī tahqīq behtar hai ki phir shikva abas hogā

ki mīr-e-kārvāñ vāqif nahīñ ādāb-e-manzil se

miTāne se kabhī naqsh-e-mohabbat miT nahīñ saktā

mirā afsāna niklegā tirī rūdād-e-mahfil se

ġhanīmat hai nazar raushan hai dil ab tak dhaḌaktā hai

mohabbat meñ to ye āsāniyāñ miltī haiñ mushkil se

ufuq ke aa.ine meñ ho na ho dhāre ke saa.e meñ

nazar aatī haiñ tūfānoñ kī sarhad jaise sāhil se

tirā jalva to kyā tū ḳhud bhī tafrīh-e-nazar hotā

mirī āñkhoñ ne ab tak bhiik māñgī hī nahīñ dil se

sitam kī āḳhirī manzil pe iz.hār-e-pashemānī

nikal aate haiñ aañsū yuuñ to har dukhte hue dil se

maiñ ik zarra huuñ lekin vus.at-e-sahrā se vāqif huuñ

uThā saktā nahīñ ḳhud mīr-e-mahfil mujh ko mahfil se

tahayya kar liyā tañg aa ke go tark-e-ta.alluq kā

magar ab fikr hai ye ḳhat unheñ likkheñge kis dil se

mujhe 'ehsān' mere qāfile vāloñ ne ab samjhā

ki ye zarra sitārā ban gayā taqdīr-e-manzil se

mujhe puchha hai aa kar tum ne us aKHlaq-e-kaamil se

ki main sharminda ho kar rah gaya andaza-e-dil se

nazar ke ruKH ko ya to dil ki jaanib pher lene do

nahin to samne aa jao uTh kar parda-e-dil se

umiden uTh rahi hain saikDon ummidwaron ki

main tanha hun magar tanha nahin uTThunga mahfil se

amir-e-karwan jis raushni ke bal pe baDhta hai

nikalta hai wo tara subh hote KHak-e-manzil se

unhen duniya ab ashk-e-gham kahe ya KHun ki bunden

mohabbat ne charagh aankhon mein la kar rakh diye dil se

ab us nang-e-mohabbat se kinara bhi to mushkil hai

mujhe jis ki mohabbat ka yaqin aaya tha mushkil se

abhi to sham hai aaghaz hai parwana-sozi ka

koi is shama ko aagah kar do subh-e-mahfil se

abhi tahqiq behtar hai ki phir shikwa abas hoga

ki mir-e-karwan waqif nahin aadab-e-manzil se

miTane se kabhi naqsh-e-mohabbat miT nahin sakta

mera afsana niklega teri rudad-e-mahfil se

ghanimat hai nazar raushan hai dil ab tak dhaDakta hai

mohabbat mein to ye aasaniyan milti hain mushkil se

ufuq ke aaine mein ho na ho dhaare ke sae mein

nazar aati hain tufanon ki sarhad jaise sahil se

tera jalwa to kya tu KHud bhi tafrih-e-nazar hota

meri aankhon ne ab tak bhik mangi hi nahin dil se

sitam ki aaKHiri manzil pe izhaar-e-pashemani

nikal aate hain aansu yun to har dukhte hue dil se

main ek zarra hun lekin wusat-e-sahra se waqif hun

uTha sakta nahin KHud mir-e-mahfil mujh ko mahfil se

tahayya kar liya tang aa ke go tark-e-talluq ka

magar ab fikr hai ye KHat unhen likkhenge kis dil se

mujhe 'ehsan' mere qafile walon ne ab samjha

ki ye zarra sitara ban gaya taqdir-e-manzil se