مجھے راس آ گئی ہے یہی حالت پریشاں

مجھے راس آ گئی ہے یہی حالت پریشاں

کبھی شام شام بجلی کبھی گام گام طوفاں

مری شام گل بداماں مری شب شب چراغاں

ترے دم قدم سے کیا کیا ہے فروغ آہ سوزاں

میں جہاں جہاں بھی ٹھہرا شب تار کے سہارے

وہی رقص آہواں تھا سر دامن بیاباں

دل زار دے سنبھالا کہ رہ وفا کٹھن ہے

کہیں رہ گزر کے کانٹے مجھے کر نہ دیں پشیماں

اسی روشنی سے لیکن وہ حکایتیں ہیں زندہ

مرے دوست بجھ نہ جائے یہ چراغ عہد و پیماں

بہ ہزار سرفروشی وہ نظر نبھا رہا ہوں

مجھے یہ نہیں گوارہ کہ ہو خواب غم پریشاں

مجھے آسرا ہے نازشؔ کہ ابھی نہیں تو آگے

مرے خون دل سے ہوگا رہ شوق میں چراغاں