mujhe ras aa gai hai yahi haalat-e-pareshan

mujhe raas aa ga.ī hai yahī hālat-e-pareshāñ

kabhī shaam shaam bijlī kabhī gaam gaam tūfāñ

mirī shaam gul-badāmāñ mirī shab shab-e-charāġhāñ

tire dam qadam se kyā kyā hai faroġh-e-āh-e-sozāñ

maiñ jahāñ jahāñ bhī Thahrā shab-e-tār ke sahāre

vahī raqs-e-āhuāñ thā sar-e-dāman-e-bayābāñ

dil-e-zār de sañbhālā ki rah-e-vafā kaThin hai

kahīñ rahguzar ke kāñTe mujhe kar na deñ pashemāñ

isī raushnī se lekin vo hikāyateñ haiñ zinda

mire dost bujh na jaa.e ye charāġh-e-ahd-o-paimāñ

ba-hazār sarfaroshī vo nazar nibhā rahā huuñ

mujhe ye nahīñ gavāra ki ho ḳhvāb-e-ġham pareshāñ

mujhe aasrā hai 'nāzish' ki abhī nahīñ to aage

mire ḳhūn-e-dil se hogā rah-e-shauq meñ charāġhāñ

mujhe ras aa gai hai yahi haalat-e-pareshan

kabhi sham sham bijli kabhi gam gam tufan

meri sham gul-badaman meri shab shab-e-charaghan

tere dam qadam se kya kya hai farogh-e-ah-e-sozan

main jahan jahan bhi Thahra shab-e-tar ke sahaare

wahi raqs-e-ahuan tha sar-e-daman-e-bayaban

dil-e-zar de sanbhaala ki rah-e-wafa kaThin hai

kahin rahguzar ke kanTe mujhe kar na den pasheman

isi raushni se lekin wo hikayaten hain zinda

mere dost bujh na jae ye charagh-e-ahd-o-paiman

ba-hazar sarfaroshi wo nazar nibha raha hun

mujhe ye nahin gawara ki ho KHwab-e-gham pareshan

mujhe aasra hai 'nazish' ki abhi nahin to aage

mere KHun-e-dil se hoga rah-e-shauq mein charaghan