مجھے رنج ہوگا نہ موت کا اگر ایسی موت نصیب ہو

مجھے رنج ہوگا نہ موت کا اگر ایسی موت نصیب ہو

مرا دم جو نکلے تو اے خدا مرے پاس میرا حبیب ہو

ہے عبث دواؤں کا سوچنا نہ تو فکر مند طبیب ہو

تو علاج اس کا کرے گا کیا جو مریض عشق حبیب ہو

کر اسیر مجھ کو بہ صد خوشی مگر اتنی عرض بھی سن مری

وہاں قید کر کہ قفس مرا مرے آشیاں کے قریب ہو

جسے تیرے حسن کی ہو خبر وہی چشم عشق ہے معتبر

بڑی خوش نصیب ہے وہ نظر تری دید جس کو نصیب ہو

شب و روز پرنمؔ غم زدہ رہے درد دل میں جو مبتلا

وہ قرار پائے تو کس طرح اسے چین کیسے نصیب ہو