mujhe saqi-e-chashm-e-yar ne ajab ek jam pila diya

mujhe sāqī-e-chashm-e-yār ne ajab ek jaam pilā diyā

ki nashe ne jis ke ġham-e-jahāñ mire dil se saaf bhulā diyā

karūñ kyā bayān maiñ vasf ab mai-e-nāb-e-ishq kā dosto

ki ḳhudī kī qaid se yak-qalam ba-ḳhudā ki mujh ko chhuḌā diyā

asar us kī chashm-e-karam kā ab karūñ kis zabān se maiñ bayāñ

ki ba-har makān-o-ba-har taraf mujhe haq kā jalva dikhā diyā

kisī aarzū kī rahī nahīñ hai mire dil meñ kuchh bhī samā.e ab

mujhe sāqiyā mai-e-lutf se tū ne kyā hī ḳhuub chakhā diyā

tirī teġh ġhamza-e-chashm ne jo haiñ qatl mujh ko kiyā sanam

to vahīñ pe īsa-e-nāz ne mujhe ek dam meñ jilā diyā

na faqat tumhārī nigāh ne mire dil ko haath se le liyā

ki tumhārī zulf-e-darāz ne mujhe sau balā meñ phañsā diyā

na thī chashm mujh ko ye ai sanam ki tumhārī chashm ne yak-qalam

mire raḳht-e-aql-o-shakeb ko barq-e-nigah se jalā diyā

mujhe tū ne apne jamāl ke dikhlā ke tarheñ nau bano

kabhū misl-e-abr rulā diyā kabhū misl-e-barq hañsā diyā

maiñ fidā-e-ḳhādim-e-shāh huuñ dil-o-jān se 'āsim' jis ne ab

jise būjhnā hī muhāl thā use ek pal meñ sūjhā diyā

mujhe saqi-e-chashm-e-yar ne ajab ek jam pila diya

ki nashe ne jis ke gham-e-jahan mere dil se saf bhula diya

karun kya bayan main wasf ab mai-e-nab-e-ishq ka dosto

ki KHudi ki qaid se yak-qalam ba-KHuda ki mujh ko chhuDa diya

asar us ki chashm-e-karam ka ab karun kis zaban se main bayan

ki ba-har makan-o-ba-har taraf mujhe haq ka jalwa dikha diya

kisi aarzu ki rahi nahin hai mere dil mein kuchh bhi samae ab

mujhe saqiya mai-e-lutf se tu ne kya hi KHub chakha diya

teri tegh ghamza-e-chashm ne jo hain qatl mujh ko kiya sanam

to wahin pe isa-e-naz ne mujhe ek dam mein jila diya

na faqat tumhaari nigah ne mere dil ko hath se le liya

ki tumhaari zulf-e-daraaz ne mujhe sau bala mein phansa diya

na thi chashm mujh ko ye ai sanam ki tumhaari chashm ne yak-qalam

mere raKHt-e-aql-o-shakeb ko barq-e-nigah se jala diya

mujhe tu ne apne jamal ke dikhla ke tarhen nau bano

kabhu misl-e-abr rula diya kabhu misl-e-barq hansa diya

main fida-e-KHadim-e-shah hun dil-o-jaan se 'asim' jis ne ab

jise bujhna hi muhaal tha use ek pal mein sujha diya