mujhe saqi ne samjhaya ishaaron hi ishaaron mein

mujhe saaqī ne samjhāyā ishāroñ hī ishāroñ meñ

mire hisse kī bāñTī jā.egī parhezgāroñ meñ

jahāñ the husn-o-ishq-o-aql-o-vahshat dil bhī jā pahuñchā

ḳhudā ke fazl se ab vo bhī hai pāñchoñ savāroñ meñ

mirī be-iḳhtiyārī meñ bhī rabt-o-zabt qaa.em hai

umaD aate haiñ jo aañsū to bahte haiñ qatāroñ meñ

dil-e-kam-zarf ne ham ko kahīñ kā bhī nahīñ chhoḌā

rahe the chaar din hazrat hamāre rāz-dāroñ meñ

fareb-e-va.ada-e-fardā kā parda hī rahe yā-rab

chhiḌī hai bahs is mauzūa par ummīdvāroñ meñ

kabhī ghar baiThe baiThe chhup-chhupā kar pī bhī letā huuñ

magar merā shumār ab tak bhī hai parhezgāroñ meñ

tumhāre faiz se ye bhī sharaf hāsil huā mujh ko

mirī dīvāngī ke tazkire haiñ hoshyāroñ meñ

bahār aate hī jab rindoñ ne apne jaam khankā.e

hirāsāñ ho ke tauba jā chhipī parhezgāroñ meñ

ḳhudā shāhid hai 'sāhir' un kī azmat aur baḌh jaatī

agar vo baiThte aa kar kabhī ham ḳhāksāroñ meñ

mujhe saqi ne samjhaya ishaaron hi ishaaron mein

mere hisse ki banTi jaegi parhezgaron mein

jahan the husn-o-ishq-o-aql-o-wahshat dil bhi ja pahuncha

KHuda ke fazl se ab wo bhi hai panchon sawaron mein

meri be-iKHtiyari mein bhi rabt-o-zabt qaem hai

umaD aate hain jo aansu to bahte hain qataron mein

dil-e-kam-zarf ne hum ko kahin ka bhi nahin chhoDa

rahe the chaar din hazrat hamare raaz-daron mein

fareb-e-wada-e-farda ka parda hi rahe ya-rab

chhiDi hai bahs is mauzua par ummidwaron mein

kabhi ghar baiThe baiThe chhup-chhupa kar pi bhi leta hun

magar mera shumar ab tak bhi hai parhezgaron mein

tumhaare faiz se ye bhi sharaf hasil hua mujh ko

meri diwangi ke tazkire hain hoshyaron mein

bahaar aate hi jab rindon ne apne jam khankae

hirasan ho ke tauba ja chhipi parhezgaron mein

KHuda shahid hai 'sahir' un ki azmat aur baDh jati

agar wo baiThte aa kar kabhi hum KHaksaron mein