mujhe sambhaal mera hath tham kar le ja

mujhe sambhāl mirā haath thaam kar le jā

thakā huā huuñ ka.ī din kā mujh ko ghar le jā

giraft-e-gul se nikal kar bikhartā jaatā huuñ

mujhe havā ke paroñ meñ sameT kar le jā

jahāñ se maañg mire naam par hayāt kī bhiik

tū merā kāsa-e-ehsās dar-ba-dar le jā

jahān-e-past ko phir dekhne kī ḳhvāhish hai

shu.ūr-e-ġham mujhe ġham ke pahāḌ par le jā

ab us se aage har ik moḌ par añdherā hai

tū apne saath mire pyaar kī sahar le jā

tū jis kī raah meñ royā hai umr bhar 'nāsik'

vo sub.h raakh huī apnī jholī bhar le jā

mujhe sambhaal mera hath tham kar le ja

thaka hua hun kai din ka mujh ko ghar le ja

giraft-e-gul se nikal kar bikharta jata hun

mujhe hawa ke paron mein sameT kar le ja

jahan se mang mere nam par hayat ki bhik

tu mera kasa-e-ehsas dar-ba-dar le ja

jahan-e-past ko phir dekhne ki KHwahish hai

shuur-e-gham mujhe gham ke pahaD par le ja

ab us se aage har ek moD par andhera hai

tu apne sath mere pyar ki sahar le ja

tu jis ki rah mein roya hai umr bhar 'nasik'

wo subh rakh hui apni jholi bhar le ja