mujhe taDpa ke sharmata to hoga

mujhe taḌpā ke sharmātā to hogā

kiye par apne pachhtātā to hogā

na lagtā hogā dil bāġh-e-iram meñ

kabhī ghar merā yaad aatā to hogā

shikast-e-zindagī de kar mujhe yuuñ

vo fāteh ban ke itrātā hogā

kabhī yaad aa hī jaate hoñge vo din

terā dil bhī taḌap jaatā to hogā

nahīñ tark-e-mohabbat itnā āsāñ

tasavvur merā rulvātā to hogā

sukūn-e-zindagī meñ hogī halchal

dil-e-maġhmūm ghabrātā to hogā

tabassum chhin gayā hogā laboñ se

vo dil hī dil meñ ġham khātā to hogā

bahār-e-rafta aatī hogī jab yaad

junūñ meñ sar ko Takrātā to hogā

ba-zāhir ḳhush sahī lekin kahāñ ḳhush

banāvaT karke thak jaatā to hogā

vafā.eñ merī yaad aatī na hoñgī

tirī āñkhoñ meñ ashk aatā hogā

ye maanā be-muravvat sañg-dil hai

magar patthar pighal jaatā to hogā

na jaanī bevafā ne qadr-e-ne.amat

mujhe ab kho ke pachhtātā to hogā

dil-e-mahzūñ meñ Tiis uThtī na hogī

ḳhayāl-e-'tāhira' aatā to hogā

mujhe taDpa ke sharmata to hoga

kiye par apne pachhtata to hoga

na lagta hoga dil bagh-e-iram mein

kabhi ghar mera yaad aata to hoga

shikast-e-zindagi de kar mujhe yun

wo fateh ban ke itraata hoga

kabhi yaad aa hi jate honge wo din

tera dil bhi taDap jata to hoga

nahin tark-e-mohabbat itna aasan

tasawwur mera rulwata to hoga

sukun-e-zindagi mein hogi halchal

dil-e-maghmum ghabraata to hoga

tabassum chhin gaya hoga labon se

wo dil hi dil mein gham khata to hoga

bahaar-e-rafta aati hogi jab yaad

junun mein sar ko Takraata to hoga

ba-zahir KHush sahi lekin kahan KHush

banawaT karke thak jata to hoga

wafaen meri yaad aati na hongi

teri aankhon mein ashk aata hoga

ye mana be-murawwat sang-dil hai

magar patthar pighal jata to hoga

na jaani bewafa ne qadr-e-neamat

mujhe ab kho ke pachhtata to hoga

dil-e-mahzun mein Tis uThti na hogi

KHayal-e-'tahira' aata to hoga