مجھے تو رنج قبا ہائے تار تار کا ہے

مجھے تو رنج قبا ہائے تار تار کا ہے

خزاں سے بڑھ کے گلوں پر ستم بہار کا ہے

کوئی نگاہ تو قندیل صرف منزل کی

چراغ دل کوئی ہر ایک رہ گزار کا ہے

ہر ایک ذرے کو ہے آفتاب کی توفیق

ہر ایک قطرے میں امکان آبشار کا ہے

ہزار رنگ صبوحی میں سو فسوں گل میں

مگر جو روپ لب و عارض نگار کا ہے

اگر نشہ ہے تو ساقی کی مست آنکھوں میں

اگر مزہ ہے تو محبوب کے کنار کا ہے

ہمارے عشق کی سنجیدگی پہ طنز نہ کر

ہمیں خبر ہے مگر مسئلہ وقار کا ہے

کسی کے وصل کے لمحے بھی خوب تھے شوکتؔ

مگر جو ہجر میں عالم یہ انتظار کا ہے