mujhe un se mohabbat ho chali hai

mujhe un se mohabbat ho chalī hai

taḌapnā dil kī qismat ho chalī hai

adāvat aur nafrat yā-ilāhī

tire bandoñ kī fitrat ho chalī hai

haqīqat thī kabhī tauqīr-e-ādam

magar ab to hikāyat ho chalī hai

karam ye bhī hai terī be-ruḳhī kā

mujhe ab ḳhud se nafrat ho chalī hai

ibādat kā sila haiñ hūr-o-ġhilmāñ

ibādat bhī tijārat ho chalī hai

hamīñ par hai nigāh-e-qahr un kī

hamīñ par ye ināyat ho chalī hai

marāsim ḳhūb-rūoñ se baḌhānā

dil-e-nādāñ kī aadat ho chalī hai

karam hone lagā ahl-e-havas par

ilāhī kyā qayāmat ho chalī hai

vafā par to na jaane kyā ho 'sābir'

jafā hī par 'masarrat' ho chalī hai

mujhe un se mohabbat ho chali hai

taDapna dil ki qismat ho chali hai

adawat aur nafrat ya-ilahi

tere bandon ki fitrat ho chali hai

haqiqat thi kabhi tauqir-e-adam

magar ab to hikayat ho chali hai

karam ye bhi hai teri be-ruKHi ka

mujhe ab KHud se nafrat ho chali hai

ibaadat ka sila hain hur-o-ghilman

ibaadat bhi tijarat ho chali hai

hamin par hai nigah-e-qahr un ki

hamin par ye inayat ho chali hai

marasim KHub-ruon se baDhana

dil-e-nadan ki aadat ho chali hai

karam hone laga ahl-e-hawas par

ilahi kya qayamat ho chali hai

wafa par to na jaane kya ho 'sabir'

jafa hi par 'masarrat' ho chali hai