mujhe ye justuju kyun ho ki kya hun aur kiya tha main

mujhe ye justujū kyuuñ ho ki kyā huuñ aur kiyā thā maiñ

koī apne sivā huuñ maiñ koī apne sivā thā maiñ

na jaane kaun sā ātish-fishāñ thā mere siine meñ

ki ḳhālī thā bahut phir bhī dhamak kar phaT paḌā thā maiñ

to kyā maiñ ne nashe meñ vāqa.ī ye guftugū kī thī

mujhe ḳhud bhī nahīñ ma.alūm thā jo sochtā thā maiñ

ḳhud apne ḳhol meñ ghuT kar na rah jaatā to kyā kartā

yahāñ ik bhiiḌ thī jis bhiiḌ meñ gum ho gayā thā maiñ

na luTnā merī qismat hī meñ thā likkhā huā varna

añdherī raat thī aur biich raste meñ khaḌā thā maiñ

guzarne ko to mujh par bhī ajab ik hādisa guzrā

magar us vaqt jab sadmoñ kā aadī ho chukā thā maiñ

maiñ kahtā thā suno sachchā.ī to ḳhud hai sila apnā

ye nukta iktisābī thā magar sach boltā thā maiñ

tujhe to dūsroñ se bhī ulajhne meñ takalluf thā

mujhe to dekh apne-āp se uljhā huā thā maiñ

ḳhulūs o iltifāt o mehr jo hai ab usī se hai

jise pahle na jaane kis nazar se dekhtā thā maiñ

jo ab yuuñ mere girdā-gird haiñ kuchh roz pahle tak

unhī logoñ ke haq meñ kis qadar sabr-āzmā thā maiñ

bahut ḳhush-ḳhulq thā maiñ bhī magar ye baat jab kī hai

na auroñ hī se vāqif thā na ḳhud ko jāntā thā maiñ

mujhe ye justuju kyun ho ki kya hun aur kiya tha main

koi apne siwa hun main koi apne siwa tha main

na jaane kaun sa aatish-fishan tha mere sine mein

ki KHali tha bahut phir bhi dhamak kar phaT paDa tha main

to kya main ne nashe mein waqai ye guftugu ki thi

mujhe KHud bhi nahin malum tha jo sochta tha main

KHud apne KHol mein ghuT kar na rah jata to kya karta

yahan ek bhiD thi jis bhiD mein gum ho gaya tha main

na luTna meri qismat hi mein tha likkha hua warna

andheri raat thi aur bich raste mein khaDa tha main

guzarne ko to mujh par bhi ajab ek hadisa guzra

magar us waqt jab sadmon ka aadi ho chuka tha main

main kahta tha suno sachchai to KHud hai sila apna

ye nukta iktisabi tha magar sach bolta tha main

tujhe to dusron se bhi ulajhne mein takalluf tha

mujhe to dekh apne-ap se uljha hua tha main

KHulus o iltifat o mehr jo hai ab usi se hai

jise pahle na jaane kis nazar se dekhta tha main

jo ab yun mere girda-gird hain kuchh roz pahle tak

unhi logon ke haq mein kis qadar sabr-azma tha main

bahut KHush-KHulq tha main bhi magar ye baat jab ki hai

na auron hi se waqif tha na KHud ko jaanta tha main