mujhe zindagi ne diya kuchh nahin

mujhe zindagī ne diyā kuchh nahīñ

magar mujh ko us kā gilā kuchh nahīñ

ḳhayāloñ ke ḳhanjar bahut tez haiñ

vahī ḳhush hai jo sochtā kuchh nahīñ

bahut ḳhūb-rū thā mirā ham-suḳhan

use dekhne meñ sunā kuchh nahīñ

bas ik pal kī dīvār hai darmiyāñ

adam se mirā fāsla kuchh nahīñ

vo gul nazr-e-ḳhāk-e-ḳhizāñ ho ga.e

ḳhabar tujh ko bād-e-sabā kuchh nahīñ

ye hañgāma-e-ālam-e-āb-o-gil

ba-juz ek shor-e-fanā kuchh nahīñ

vahī hijr hai aur vahī vasl hai

mirā tajraba bhī nayā kuchh nahīñ

tavālat mirī guftugū meñ jo thī

mire paas kahne ko thā kuchh nahīñ

'farāsat' vahī be-hisī hai yahāñ

tire girye se to huā kuchh nahīñ

mujhe zindagi ne diya kuchh nahin

magar mujh ko us ka gila kuchh nahin

KHayalon ke KHanjar bahut tez hain

wahi KHush hai jo sochta kuchh nahin

bahut KHub-ru tha mera ham-suKHan

use dekhne mein suna kuchh nahin

bas ek pal ki diwar hai darmiyan

adam se mera fasla kuchh nahin

wo gul nazr-e-KHak-e-KHizan ho gae

KHabar tujh ko baad-e-saba kuchh nahin

ye hangama-e-alam-e-ab-o-gil

ba-juz ek shor-e-fana kuchh nahin

wahi hijr hai aur wahi wasl hai

mera tajraba bhi naya kuchh nahin

tawalat meri guftugu mein jo thi

mere pas kahne ko tha kuchh nahin

'farasat' wahi be-hisi hai yahan

tere girye se to hua kuchh nahin