muKhaalif aandhiyon mein azm ke dipak jalata hun

muḳhālif āñdhiyoñ meñ azm ke dīpak jalātā huuñ

kabhī jab vaqt paḌtā hai to ḳhud ko āzmātā huuñ

maiñ shahzāda havā kā huuñ ḳhalā merī riyāsat hai

kabhī maiñ uḌte uḌte āsmāñ ko phāñd jaatā huuñ

kabhī maiñ ret hī se kheltā rahtā huuñ bachchoñ sā

kabhī maiñ zaat ke gahre samundar meñ nahātā huuñ

kabhī be-ḳhud paḌā rahtā huuñ maiñ parda-nashīñ ho kar

kabhī fitrat ke ik ik raaz se parde uThātā huuñ

kabhī ehsās kā ik ḳhaar chubh jaa.e to ro uTThūñ

kabhī maiñ daar ke taḳhte pe chaḌh kar muskurātā huuñ

kabhī maiñ rote rote hañs diyā kartā huuñ pāgal sā

kabhī maiñ hañste hañste āñsuoñ se bhiig jaatā huuñ

kabhī maiñ be-his-o-harakat paḌā rahtā huuñ pahroñ tak

kabhī maiñ zindagī ke saaz par naġhme sunātā huuñ

kabhī zarḳhez dhartī ko bhī ḳhātir meñ nahīñ laatā

kabhī banjar zamīñ meñ aas ke paude lagātā huuñ

maiñ ik qatra huuñ lekin ab samundar ban gayā samho

maiñ ik naddī se mil kar sū-e-manzil bhāgā jaatā huuñ

mirī fitrat ajab hai aaj tak maiñ bhī nahīñ samjhā

vo jin ke par nahīñ hote unheñ uḌnā sikhātā huuñ

maiñ gahre pāniyoñ ko chiir detā huuñ magar 'hasrat'

jahāñ paanī bahut kam ho vahāñ maiñ Duub jaatā huuñ

muKHalif aandhiyon mein azm ke dipak jalata hun

kabhi jab waqt paDta hai to KHud ko aazmata hun

main shahzada hawa ka hun KHala meri riyasat hai

kabhi main uDte uDte aasman ko phand jata hun

kabhi main ret hi se khelta rahta hun bachchon sa

kabhi main zat ke gahre samundar mein nahata hun

kabhi be-KHud paDa rahta hun main parda-nashin ho kar

kabhi fitrat ke ek ek raaz se parde uThata hun

kabhi ehsas ka ek KHar chubh jae to ro uTThun

kabhi main dar ke taKHte pe chaDh kar muskuraata hun

kabhi main rote rote hans diya karta hun pagal sa

kabhi main hanste hanste aansuon se bhig jata hun

kabhi main be-his-o-harakat paDa rahta hun pahron tak

kabhi main zindagi ke saz par naghme sunata hun

kabhi zarKHez dharti ko bhi KHatir mein nahin lata

kabhi banjar zamin mein aas ke paude lagata hun

main ek qatra hun lekin ab samundar ban gaya samho

main ek naddi se mil kar su-e-manzil bhaga jata hun

meri fitrat ajab hai aaj tak main bhi nahin samjha

wo jin ke par nahin hote unhen uDna sikhata hun

main gahre paniyon ko chir deta hun magar 'hasrat'

jahan pani bahut kam ho wahan main Dub jata hun