muKhaalif ho zamin meri ki dushman aasman mera

muḳhālif ho zamīñ merī ki dushman āsmāñ merā

rahegā rahtī duniyā tak chaman meñ āshiyāñ merā

maiñ chāhūñ bhī to khul saktā nahīñ rāz-e-nihāñ merā

ki is mahfil meñ koī bhī nahīñ hai ham-zabāñ merā

nahīñ mumkin kahīñ bhī mil sake mujh ko nishāñ merā

agar dāman na chhoḌeñge ye nāqūs-o-azāñ merā

yaqīñ hai mujh ko apne dast-o-bāzū azm-o-himmat par

balā se gar muḳhālif hai ye daur-e-āsmāñ merā

uḌā kar le chalī hai mujh ko manzil kī kashish dekhūñ

kahāñ tak saath dete haiñ ye ahl-e-kārvāñ merā

abhī ummīd kā dāman hai mere dast-e-himmat meñ

ḳhudā rakkhe salāmat hai abhī azm-e-javāñ merā

ye duniyā hai havādis-gāh yā maktab mohabbat kā

zamāna har qadam par le rahā hai imtihāñ merā

musalsal bārish-e-faulād-o-ātish hai jahāñ maiñ huuñ

na raas aa.egā tujh ko ālam-e-barq-o-dukhāñ merā

panapte haiñ yahāñ buuTe na khiltī haiñ yahāñ kaliyāñ

ḳhizāñ-ḳhurda chaman sar-sar-zada hai gulsitāñ merā

agar yuuñ hī rahī gardish meñ duniyā to ajab kyā hai

phir ik din sajda-gāh-e-qudsiyāñ ho āstāñ merā

gul-o-bulbul ko nazr-e-tāq-e-nisyāñ kar chukā huuñ maiñ

muarra kyoñ na ho husn-e-tasanño se bayāñ merā

abhī vahm-o-gumāñ kī vādiyoñ meñ tū hai sargardāñ

tirī manzil se kosoñ baḌh gayā hai kārvāñ merā

ye sher-o-shā.erī hai 'ashk' iqlīm-e-suḳhan mujh ko

qalam merā alam hai aur zabāñ merī nishāñ merā

muKHalif ho zamin meri ki dushman aasman mera

rahega rahti duniya tak chaman mein aashiyan mera

main chahun bhi to khul sakta nahin raaz-e-nihan mera

ki is mahfil mein koi bhi nahin hai ham-zaban mera

nahin mumkin kahin bhi mil sake mujh ko nishan mera

agar daman na chhoDenge ye naqus-o-azan mera

yaqin hai mujh ko apne dast-o-bazu azm-o-himmat par

bala se gar muKHalif hai ye daur-e-asman mera

uDa kar le chali hai mujh ko manzil ki kashish dekhun

kahan tak sath dete hain ye ahl-e-karwan mera

abhi ummid ka daman hai mere dast-e-himmat mein

KHuda rakkhe salamat hai abhi azm-e-jawan mera

ye duniya hai hawadis-gah ya maktab mohabbat ka

zamana har qadam par le raha hai imtihan mera

musalsal barish-e-faulad-o-atish hai jahan main hun

na ras aaega tujh ko aalam-e-barq-o-dukhan mera

panapte hain yahan buTe na khilti hain yahan kaliyan

KHizan-KHurda chaman sar-sar-zada hai gulsitan mera

agar yun hi rahi gardish mein duniya to ajab kya hai

phir ek din sajda-gah-e-qudsiyan ho aastan mera

gul-o-bulbul ko nazr-e-taq-e-nisyan kar chuka hun main

muarra kyon na ho husn-e-tasanno se bayan mera

abhi wahm-o-guman ki wadiyon mein tu hai sargardan

teri manzil se koson baDh gaya hai karwan mera

ye sher-o-shaeri hai 'ashk' iqlim-e-suKHan mujh ko

qalam mera alam hai aur zaban meri nishan mera