مخالفین بھی ہوں تو سلام کرنا ہے

مخالفین بھی ہوں تو سلام کرنا ہے

ہمیں خلوص و محبت سے کام کرنا ہے

یہی ہے خواہش و ارماں کہ سب کے کام آؤں

یہی ہے کام ضروری یہ کام کرنا ہے

یہ زندگی ہے خود احسان اس کے بدلے میں

خدا کا شکر ہمیں صبح و شام کرنا ہے

نہ پھوٹ ڈال سکے گا کوئی ہمارے بیچ

ہم ایک ہیں ہمیں چرچا یہ عام کرنا ہے

غموں سے لاکھ ہوں مجبور پھر بھی دنیا میں

سبھی کو پیش مسرت کا جام کرنا ہے

دکھی دلوں کے مددگار جس میں ہوں ساحرؔ

جہاں میں ہم کو وہ رائج نظام کرنا ہے