muKHtasar ye hai haqiqat ishq ke aazar ki

muḳhtasar ye hai haqīqat ishq ke āzār kī

umr-bhar tīmār-dārī kī dil-e-bīmār kī

chain lene de dil-e-muztar kisī dam bahr-e-shaġhl

tū ne o kam-baḳht ab to zindagī dushvār kī

hijr kī shab sochtā huuñ maiñ kahāñ huuñ kaun huuñ

dekhtā huuñ ġhaur se sūrat dar-o-dīvār kī

ab to jī ghabrā gayā hūr-o-jināñ ke zikr se

hazrat-e-vā.iz bhalā had hai koī tūmār kī

āh-o-zārī kī kabhī aḳhtar-shumārī kī kabhī

kis musībat se kaTī hai raat hijr-e-yār kī

ḳhuub soche hazrat-e-vā.iz jo chupke pī ga.e

laaj rakh lī aap ne jo jubba-o-dastār kī

ġham nahīñ kuchh bah gayā āñkhoñ se gar ḳhūn-e-jigar

ho ga.ī puurī ḳhushī to dīda-e-ḳhūñ-bār kī

aaj kyā samjhā hai saaqī ne jo mai detā nahīñ

maiñ ne tauba is se pahle bhī to lākhoñ baar kī

ai asīrān-e-qafas kyā ā.eñge aise bhī dil

phir kabhī dekheñge sūrat ham gul-o-gulzār kī

ab to vo har baat par kar dete haiñ fauran nahīñ

paḌ ga.ī hai aisī kuchh aadat unheñ inkār kī

aaj kuchh barham the vo bhī aur ham bhī the bhare

bātoñ hī bātoñ meñ naubat aa ga.ī takrār kī

de chukī jab naza.a kī hālat meñ goyā.ī javāb

pūchhne baiThe haiñ ḳhvāhish aah ab bīmār kī

har qadam par ābloñ se ik na.ī taklīf hai

kis tarah tai hogī manzil vādī-e-pur-ḳhār kī

ho sakī 'ishrat' na koshish aah koī kāmyāb

har ghaḌī karte rahe tadbīr vasl-e-yār kī

muKHtasar ye hai haqiqat ishq ke aazar ki

umr-bhar timar-dari ki dil-e-bimar ki

chain lene de dil-e-muztar kisi dam bahr-e-shaghl

tu ne o kam-baKHt ab to zindagi dushwar ki

hijr ki shab sochta hun main kahan hun kaun hun

dekhta hun ghaur se surat dar-o-diwar ki

ab to ji ghabra gaya hur-o-jinan ke zikr se

hazrat-e-waiz bhala had hai koi tumar ki

aah-o-zari ki kabhi aKHtar-shumari ki kabhi

kis musibat se kaTi hai raat hijr-e-yar ki

KHub soche hazrat-e-waiz jo chupke pi gae

laj rakh li aap ne jo jubba-o-dastar ki

gham nahin kuchh bah gaya aankhon se gar KHun-e-jigar

ho gai puri KHushi to dida-e-KHun-bar ki

aaj kya samjha hai saqi ne jo mai deta nahin

main ne tauba is se pahle bhi to lakhon bar ki

ai asiran-e-qafas kya aaenge aise bhi dil

phir kabhi dekhenge surat hum gul-o-gulzar ki

ab to wo har baat par kar dete hain fauran nahin

paD gai hai aisi kuchh aadat unhen inkar ki

aaj kuchh barham the wo bhi aur hum bhi the bhare

baaton hi baaton mein naubat aa gai takrar ki

de chuki jab naza ki haalat mein goyai jawab

puchhne baiThe hain KHwahish aah ab bimar ki

har qadam par aablon se ek nai taklif hai

kis tarah tai hogi manzil wadi-e-pur-KHar ki

ho saki 'ishrat' na koshish aah koi kaamyab

har ghaDi karte rahe tadbir wasl-e-yar ki