mulahiza ho meri bhi uDan pinjre mein

mulāhiza ho mirī bhī uḌaan pinjre meñ

atā hue haiñ mujhe do-jahān pinjre meñ

hai sair-gāh bhī aur is meñ āb-o-dāna bhī

rakhā gayā hai mirā kitnā dhyān pinjre meñ

is ek shart par us ne rihā kiyā mujh ko

rakhegā rehn vo merī uḌaan pinjre meñ

yahīñ halāk huā hai parinda ḳhvāhish kā

tabhī to haiñ ye lahū ke nishān pinjre meñ

mujhe satā.egā tanhā.iyoñ kā mausam kyā

hai mere saath mirā ḳhāndān pinjre meñ

falak pe jab bhī parindoñ kī saf nazar aa.ī

huī haiñ kitnī hī yādeñ javān pinjre meñ

ḳhayāl aayā hameñ bhī ḳhudā kī rahmat kā

sunā.ī jab bhī paḌī hai azaan pinjre meñ

tarah tarah ke sabaq is liye raTā.e ga.e

maiñ bhuul jā.ūñ khulā āsmān pinjre meñ

mulahiza ho meri bhi uDan pinjre mein

ata hue hain mujhe do-jahan pinjre mein

hai sair-gah bhi aur is mein aab-o-dana bhi

rakha gaya hai mera kitna dhyan pinjre mein

is ek shart par us ne riha kiya mujh ko

rakhega rehn wo meri uDan pinjre mein

yahin halak hua hai parinda KHwahish ka

tabhi to hain ye lahu ke nishan pinjre mein

mujhe sataega tanhaiyon ka mausam kya

hai mere sath mera KHandan pinjre mein

falak pe jab bhi parindon ki saf nazar aai

hui hain kitni hi yaaden jawan pinjre mein

KHayal aaya hamein bhi KHuda ki rahmat ka

sunai jab bhi paDi hai azan pinjre mein

tarah tarah ke sabaq is liye raTae gae

main bhul jaun khula aasman pinjre mein