mulzim Thahri main apni sachchai se

mulzim Thahrī maiñ apnī sachchā.ī se

jhuuT ne baazī maar lī paa.ī paa.ī se

haq-talfī bhī ḳhāmoshī se sah jaa.eñ

faisla karnā mushkil hai dānā.ī se

us ko sochte rahnā achchhā lagtā hai

kaisā naata juḌ gayā us harjā.ī se

badle meñ vo sāñseñ girvī rakh legā

bach ke rahnā aaj ke hātim-tā.ī se

koī mujh meñ rahtā hai mujh se chhup kar

Dar nahīñ lagtā ab apnī tanhā.ī se

bhūle se aa jaa.e vo chhat par ik din

chāñd ko dekhūñ maiñ apnī añgnā.ī se

tāza-dam rakhtī hai terī ḳhushbū hī

mujh ko nisbat kyā gulshan-ārā.ī se

phuul se lahje zaḳhm jahāñ dete haiñ ġhazal

Dartī huuñ aisī izzat-afzā.ī se

mulzim Thahri main apni sachchai se

jhuT ne bazi mar li pai pai se

haq-talfi bhi KHamoshi se sah jaen

faisla karna mushkil hai danai se

us ko sochte rahna achchha lagta hai

kaisa nata juD gaya us harjai se

badle mein wo sansen girwi rakh lega

bach ke rahna aaj ke hatim-tai se

koi mujh mein rahta hai mujh se chhup kar

Dar nahin lagta ab apni tanhai se

bhule se aa jae wo chhat par ek din

chand ko dekhun main apni angnai se

taza-dam rakhti hai teri KHushbu hi

mujh ko nisbat kya gulshan-arai se

phul se lahje zaKHm jahan dete hain ghazal

Darti hun aisi izzat-afzai se