mumkin hai kahan barson talak shad rahen hum

mumkin hai kahāñ barsoñ talak shaad raheñ ham

duniyā to chāhtī hai ki barbād raheñ ham

ham muhr-ba-lab zulm-o-sitam par raheñ kab tak

kab tak hadaf-e-nāvak-e-bedād raheñ ham

tārīḳh badalnī hai to phir kaisā taraddud

ye baat alag chand hī afrād raheñ ham

kuchh aisā koī kaam kareñ rū-e-zamīñ par

logoñ ko hamesha ke liye yaad raheñ ham

milnā to bahut duur hai lekin tā-qayāmat

imkāñ hai ki is mulk meñ ābād raheñ ham

mustaqbil-e-insāñ kā taqāzā hai ye 'jauhar'

ki ek na.ī nasl kī buniyād raheñ ham

mumkin hai kahan barson talak shad rahen hum

duniya to chahti hai ki barbaad rahen hum

hum muhr-ba-lab zulm-o-sitam par rahen kab tak

kab tak hadaf-e-nawak-e-bedad rahen hum

tariKH badalni hai to phir kaisa taraddud

ye baat alag chand hi afrad rahen hum

kuchh aisa koi kaam karen ru-e-zamin par

logon ko hamesha ke liye yaad rahen hum

milna to bahut dur hai lekin ta-qayamat

imkan hai ki is mulk mein aabaad rahen hum

mustaqbil-e-insan ka taqaza hai ye 'jauhar'

ki ek nai nasl ki buniyaad rahen hum