mumkin jo hui humse wo tadbir kare hain

mumkin jo huī ham se vo tadbīr kare haiñ

jo zaḳhm hare the haañ abhī tak vo hare haiñ

batlāo to rakkheñ bhī kahāñ ġham ke dafīne

bartan jo mayassar the hameñ saare bhare haiñ

ab kaise mile jannat-o-dozaḳh kī bashārat

a.amāl ke sikke to sabhī khoTe khare haiñ

barsoñ se is ehsās meñ halchal nahīñ koī

ik umr huī haath par ham haath dhare haiñ

be-ḳhauf haiñ is daur meñ shaitāñ ke pujārī

allāh ke bande to sabhī sahme Dare haiñ

rahtā hī nahīñ hai kisī rishte meñ tavāzun

jo aql ke nazdīk haiñ vo dil se pare haiñ

marne ke liye kaun jiyā hai yahāñ 'ḳhanda'

dekhā hai ki jiine ke liye log mare haiñ

mumkin jo hui hum se wo tadbir kare hain

jo zaKHm hare the han abhi tak wo hare hain

batlao to rakkhen bhi kahan gham ke dafine

bartan jo mayassar the hamein sare bhare hain

ab kaise mile jannat-o-dozaKH ki bashaarat

aamal ke sikke to sabhi khoTe khare hain

barson se is ehsas mein halchal nahin koi

ek umr hui hath par hum hath dhare hain

be-KHauf hain is daur mein shaitan ke pujari

allah ke bande to sabhi sahme Dare hain

rahta hi nahin hai kisi rishte mein tawazun

jo aql ke nazdik hain wo dil se pare hain

marne ke liye kaun jiya hai yahan 'KHanda'

dekha hai ki jine ke liye log mare hain