ممکن جو ہوئی ہم سے وہ تدبیر کرے ہیں

ممکن جو ہوئی ہم سے وہ تدبیر کرے ہیں

جو زخم ہرے تھے ہاں ابھی تک وہ ہرے ہیں

بتلاؤ تو رکھیں بھی کہاں غم کے دفینے

برتن جو میسر تھے ہمیں سارے بھرے ہیں

اب کیسے ملے جنت و دوزخ کی بشارت

اعمال کے سکے تو سبھی کھوٹے کھرے ہیں

برسوں سے اس احساس میں ہلچل نہیں کوئی

اک عمر ہوئی ہاتھ پر ہم ہاتھ دھرے ہیں

بے خوف ہیں اس دور میں شیطاں کے پجاری

اللہ کے بندے تو سبھی سہمے ڈرے ہیں

رہتا ہی نہیں ہے کسی رشتے میں توازن

جو عقل کے نزدیک ہیں وہ دل سے پرے ہیں

مرنے کے لئے کون جیا ہے یہاں خندہؔ

دیکھا ہے کہ جینے کے لئے لوگ مرے ہیں