mumkin nahin hai apne ko ruswa wafa kare

mumkin nahīñ hai apne ko rusvā vafā kare

duniyā-e-be-sabāt kī ḳhātir duā kare

nūr-e-vajūd aur agar hausla kare

sham-e-hayāt jal ke bhī kuchh lau diyā kare

mar mar ke koī kab talak āḳhir jiyā kare

kyuuñ har nafas se ziist ke ta.ane sunā kare

jab koshish-e-tamām bhī rah jaa.e nā-tamām

ai hāsil-e-hayāt batā koī kyā kare

jo ġham nasīb-e-yār ho ḳhud apnī ziist par

kab tak nigāh-e-nāz kā vo aasrā kare

hai ālam-e-vajūd pe chhāyā huā jumūd

ai kaash inqalāb koī faisla kare

ab aarzū yahī hai dam-e-naza.a ai 'vafā'

ġhair-az-ḳhudā na yaad rahe kuchh ḳhudā kare

mumkin nahin hai apne ko ruswa wafa kare

duniya-e-be-sabaat ki KHatir dua kare

nur-e-wajud aur agar hausla kare

sham-e-hayat jal ke bhi kuchh lau diya kare

mar mar ke koi kab talak aaKHir jiya kare

kyun har nafas se zist ke tane suna kare

jab koshish-e-tamam bhi rah jae na-tamam

ai hasil-e-hayat bata koi kya kare

jo gham nasib-e-yar ho KHud apni zist par

kab tak nigah-e-naz ka wo aasra kare

hai aalam-e-wajud pe chhaya hua jumud

ai kash inqalab koi faisla kare

ab aarzu yahi hai dam-e-naza ai 'wafa'

ghair-az-KHuda na yaad rahe kuchh KHuda kare