mumkin nahin ki faiz-e-junun raegan rahe

mumkin nahīñ ki faiz-e-junūñ rā.egāñ rahe

ye bhī to ik nishāñ hai ki ham be-nishāñ rahe

aajiz tirī talāsh meñ kaun-o-makāñ rahe

ab jo tujhe talāsh kare vo kahāñ rahe

be-vāsta nazāra-e-shān-e-jamāl kar

ye bhī hai ik ḳhatā ki nazar darmiyāñ rahe

taufīq de ki pesh karūñ ġham ko is tarah

duniyā ko mere ġham pe ḳhushī kā gumāñ rahe

shaam un kī ik adā hai sahar un kā ek nuur

ya.anī ki vo ayaañ na hue aur ayaañ rahe

baḳhshā hai mujh ko un kī nazar ne zahe karam

vo hosh jis pe be-ḳhabarī kā gumāñ rahe

shauq-e-suḳhan fuzūl hai 'shāhid' baġhair-e-ishq

dil meñ koī ḳhalish ho to muñh meñ zabāñ rahe

mumkin nahin ki faiz-e-junun raegan rahe

ye bhi to ek nishan hai ki hum be-nishan rahe

aajiz teri talash mein kaun-o-makan rahe

ab jo tujhe talash kare wo kahan rahe

be-wasta nazara-e-shan-e-jamal kar

ye bhi hai ek KHata ki nazar darmiyan rahe

taufiq de ki pesh karun gham ko is tarah

duniya ko mere gham pe KHushi ka guman rahe

sham un ki ek ada hai sahar un ka ek nur

yani ki wo ayan na hue aur ayan rahe

baKHsha hai mujh ko un ki nazar ne zahe karam

wo hosh jis pe be-KHabari ka guman rahe

shauq-e-suKHan fuzul hai 'shahid' baghair-e-ishq

dil mein koi KHalish ho to munh mein zaban rahe