mumkin nahin ki teri mohabbat ki bu na ho

mumkin nahīñ ki terī mohabbat kī bū na ho

kāfir agar hazār baras dil meñ tū na ho

kyā lutf-e-intizār jo tū hīla-jū na ho

kis kaam kā visāl agar aarzū na ho

mahshar meñ aur un se mirī dū-ba-dū na ho

kahne kī baat hai jo koī guftugū na ho

qātil agar na shoḳh ho ḳhanjar agar na tez

rag rag meñ be-qarār hamārā lahū na ho

ḳhalvat meñ tujh ko chain nahīñ kis kā ḳhauf hai

andesha kuchh na ho jo nazar chaar sū na ho

surḳhī hai teġh par na hinā tere haath meñ

qātil kahīñ safed adū kā lahū na ho

vo aadmī kahāñ hai vo insān hai kahāñ

jo dost kā ho dost adū kā adū na ho

dil ko masal masal ke zarā haath sūñghiye

mumkin nahīñ ki ḳhūn-e-tamannā kī bū na ho

zāhid mazā to jab hai azaab o savāb kā

dozaḳh meñ bāda-kash na hoñ jannat meñ tū na ho

māshūq-e-hijr us se ziyāda koī nahīñ

kyā dil-lagī rahe jo tirī aarzū na ho

aise kahāñ nasīb ki vo but ho ham-kalām

ham tuur par bhī jaa.eñ to kuchh guftugū na ho

dast-e-duā ko miltī hai tāsīr arsh se

jo haath se ho paañv se vo justujū na ho

ġhash aa na jaa.e dekh ke qātil ko mauj-e-ḳhūñ

nāzuk-mizāj kā kahīñ halkā lahū na ho

hai laag kā mazā dil-e-be-mudda.ā ke saath

tum kyā karo kisī ko agar aarzū na ho

ye TuuT kar kabhī na banegā kisī tarah

zāhid shikast-e-tauba shikast-e-sabū na ho

ai 'dāġh' aa ke phir ga.e vo is ko kyā kareñ

puurī jo nā-murād tirī aarzū na ho

mumkin nahin ki teri mohabbat ki bu na ho

kafir agar hazar baras dil mein tu na ho

kya lutf-e-intizar jo tu hila-ju na ho

kis kaam ka visal agar aarzu na ho

mahshar mein aur un se meri du-ba-du na ho

kahne ki baat hai jo koi guftugu na ho

qatil agar na shoKH ho KHanjar agar na tez

rag rag mein be-qarar hamara lahu na ho

KHalwat mein tujh ko chain nahin kis ka KHauf hai

andesha kuchh na ho jo nazar chaar su na ho

surKHi hai tegh par na hina tere hath mein

qatil kahin safed adu ka lahu na ho

wo aadmi kahan hai wo insan hai kahan

jo dost ka ho dost adu ka adu na ho

dil ko masal masal ke zara hath sunghiye

mumkin nahin ki KHun-e-tamanna ki bu na ho

zahid maza to jab hai azab o sawab ka

dozaKH mein baada-kash na hon jannat mein tu na ho

mashuq-e-hijr us se ziyaada koi nahin

kya dil-lagi rahe jo teri aarzu na ho

aise kahan nasib ki wo but ho ham-kalam

hum tur par bhi jaen to kuchh guftugu na ho

dast-e-dua ko milti hai tasir arsh se

jo hath se ho panw se wo justuju na ho

ghash aa na jae dekh ke qatil ko mauj-e-KHun

nazuk-mizaj ka kahin halka lahu na ho

hai lag ka maza dil-e-be-muddaa ke sath

tum kya karo kisi ko agar aarzu na ho

ye TuT kar kabhi na banega kisi tarah

zahid shikast-e-tauba shikast-e-sabu na ho

ai 'dagh' aa ke phir gae wo is ko kya karen

puri jo na-murad teri aarzu na ho