munafiq hain KHabar hai wo karenge war chupke se

munāfiq haiñ ḳhabar hai vo kareñge vaar chupke se

hameñ suulī chaḌhā.eñge hamāre yaar chupke se

bhañvar dariyā ke gahre haiñ shanāvar bhī nahīñ huuñ maiñ

safīna ban ke ye lahreñ karūñgā paar chupke se

bichhā.e phuul jin kī raah meñ ham ne sadā us ne

'evaz phūloñ ke hāthoñ meñ chubho.e ḳhaar chupke se

kabhī jab us se ye pūchhā ki kyā mujh se mohabbat hai

nafī meñ sar hilāyā phir kiyā iqrār chupke se

gale lag kar maiñ royā thā sabhī peḌoñ se pat-jhaḌ meñ

so mujh se guftugū karne lage ashjār chupke se

tumheñ ye jis ne mimbar par farebī se biThāyā hai

vo rafta-rafta kholeñge tirī dastār chupke se

sadā haq kī koī 'sārim' lagā.e gar to sab zālim

galā us kā dabā.eñge sar-e-bāzār chupke se

munafiq hain KHabar hai wo karenge war chupke se

hamein suli chaDhaenge hamare yar chupke se

bhanwar dariya ke gahre hain shanawar bhi nahin hun main

safina ban ke ye lahren karunga par chupke se

bichhae phul jin ki rah mein hum ne sada us ne

'ewaz phulon ke hathon mein chubhoe KHar chupke se

kabhi jab us se ye puchha ki kya mujh se mohabbat hai

nafi mein sar hilaya phir kiya iqrar chupke se

gale lag kar main roya tha sabhi peDon se pat-jhaD mein

so mujh se guftugu karne lage ashjar chupke se

tumhein ye jis ne mimbar par farebi se biThaya hai

wo rafta-rafta kholenge teri dastar chupke se

sada haq ki koi 'sarim' lagae gar to sab zalim

gala us ka dabaenge sar-e-bazar chupke se