munh andhere ghar se nikle phir the hangame bahut

muñh añdhere ghar se nikle phir the hañgāme bahut

din Dhalā tanhā hue aur raat bhar pighle bahut

rañj ke andhe kueñ meñ raat ab kaise kaTe

dekhne ko din meñ dekhe chāñd se chehre bahut

phir bhī ham ik dūsre se bad-gumāñ kyā kyā rahe

jhuuT ham ne bhī na bolā tum bhī the sachche bahut

thā irāda un ke ghar se bach ke ham nikleñ magar

har qadam par un ke ghar ke rāste aa.e bahut

in dinoñ rahte haiñ logoñ se hameñ kyā kyā gile

aur lagte bhī haiñ ham ko log sab achchhe bahut

peḌ apne dasht meñ ab ham lagā kar kyā kareñ

dhuup ne phailā diye haiñ duur tak saa.e bahut

munh andhere ghar se nikle phir the hangame bahut

din Dhala tanha hue aur raat bhar pighle bahut

ranj ke andhe kuen mein raat ab kaise kaTe

dekhne ko din mein dekhe chand se chehre bahut

phir bhi hum ek dusre se bad-guman kya kya rahe

jhuT hum ne bhi na bola tum bhi the sachche bahut

tha irada un ke ghar se bach ke hum niklen magar

har qadam par un ke ghar ke raste aae bahut

in dinon rahte hain logon se hamein kya kya gile

aur lagte bhi hain hum ko log sab achchhe bahut

peD apne dasht mein ab hum laga kar kya karen

dhup ne phaila diye hain dur tak sae bahut