munh apna KHushk hai aur chashm tar hai

muñh apnā ḳhushk hai aur chashm tar hai

tire ġham meñ ye sair-e-bahr-o-bar hai

ḳhabar le dil kī us se jis kā ghar hai

kisī ke ghar kī ham ko kyā ḳhabar hai

vo ab kyūñkar na khīñche aap ko duur

hamāre chāhne kā ye asar hai

hameñ kuchh vo nahīñ haiñ aah varna

vahī hai shaam aur vo hī sahar hai

hameñ dekho na dekho tum hameñ to

tumhārā dekhnā madd-e-nazar hai

sunā le marte marte gul ko bulbul

koī naala tire dil meñ agar hai

uThātā hai jo roz uTh dard-o-ġham ko

kise tāqat hai merā hī jigar hai

kabhī bastā thā ik aalam yahāñ bhī

ye dil jo ab ki ujḌā sā nagar hai

kahā chāhe hai kuchh kahtā hai kuchh aur

'hasan' dhyān in dinoñ terā kidhar hai

munh apna KHushk hai aur chashm tar hai

tere gham mein ye sair-e-bahr-o-bar hai

KHabar le dil ki us se jis ka ghar hai

kisi ke ghar ki hum ko kya KHabar hai

wo ab kyunkar na khinche aap ko dur

hamare chahne ka ye asar hai

hamein kuchh wo nahin hain aah warna

wahi hai sham aur wo hi sahar hai

hamein dekho na dekho tum hamein to

tumhaara dekhna madd-e-nazar hai

suna le marte marte gul ko bulbul

koi nala tere dil mein agar hai

uThata hai jo roz uTh dard-o-gham ko

kise taqat hai mera hi jigar hai

kabhi basta tha ek aalam yahan bhi

ye dil jo ab ki ujDa sa nagar hai

kaha chahe hai kuchh kahta hai kuchh aur

'hasan' dhyan in dinon tera kidhar hai