munh chhupao na tum naqab mein jaan

muñh chhupāo na tum naqāb meñ jaan

yūñhī āshiq kī hai azaab meñ jaan

juuñ sī chuTkī meñ le ke mal Daalī

ham se āshiq kī hai azaab meñ jaan

ḳhūbī-e-husn ne tirī na rakhī

baaqī ik zarra shaiḳh o shaab meñ jaan

kis kī zulfoñ ke pech-o-tāb se hai

raat din merī pech-o-tāb meñ jaan

saḳht mushtāq hai tumhārā dil

muñh dikhāo kabhī to ḳhvāb meñ jaan

ek din tum ne kī na baat kabhū

mar ga.e ham to is hijāb meñ jaan

nit tire intizār-e-ġhusl se hai

bahr ke dīda-e-hubāb meñ jaan

mah ne ai shahsavār-e-arsa-e-husn

āqibat dī tirī rikāb meñ jaan

us ne bhar kar nigāh dekhā thā

nahīñ us din se āftāb meñ jaan

sar-e-ātish jo ashk-e-rezāñ thā

kisī āshiq kī thī kabāb meñ jaan

'mus.hafī' thā zi-bas-ki āshiq-e-sher

marte marte rahī kitāb meñ jaan

munh chhupao na tum naqab mein jaan

yunhi aashiq ki hai azab mein jaan

jun si chuTki mein le ke mal Dali

hum se aashiq ki hai azab mein jaan

KHubi-e-husn ne teri na rakhi

baqi ek zarra shaiKH o shab mein jaan

kis ki zulfon ke pech-o-tab se hai

raat din meri pech-o-tab mein jaan

saKHt mushtaq hai tumhaara dil

munh dikhao kabhi to KHwab mein jaan

ek din tum ne ki na baat kabhu

mar gae hum to is hijab mein jaan

nit tere intizar-e-ghusl se hai

bahr ke dida-e-hubab mein jaan

mah ne ai shahsawar-e-arsa-e-husn

aaqibat di teri rikab mein jaan

us ne bhar kar nigah dekha tha

nahin us din se aaftab mein jaan

sar-e-atish jo ashk-e-rezan tha

kisi aashiq ki thi kabab mein jaan

'mushafi' tha zi-bas-ki aashiq-e-sher

marte marte rahi kitab mein jaan