munh zer-e-tak khola waiz bahut hi chuka

muñh zer-e-tāk kholā vaa.iz bahut hī chūkā

beloñ ne dāḌhī pakḌī ḳhoshoñ ne muñh meñ thūkā

kahtā hai kyuuñ anal-haq jo qatra hai lahū kā

muñh khul gayā hai shāyad merī rag-e-gulū kā

shoḳhī jo barq kī hai garmī sharār kī hai

kuchh kah rahā hai muusā andāz-e-guftugū kā

dhonā hai vaqt-e-āḳhir muñh kī mujhe siyāhī

ai ashk-e-sharm ab bhī mauqa hai shust-o-shū kā

kyuuñ tifl-e-ashk lipTe ai dil na āstīñ se

parvarda hai ye mere dāmān-e-ārzū kā

saaqī bahār dar-kaf phuul aa.e mai-kade se

tūfān uTh rahā hai gulshan meñ rañg-o-bū kā

vaa.iz tujhe ḳhabar hai mai-ḳhāna kis kā ghar hai

ḳhum us kī pusht par hai khulvā na muñh subū kā

mere badan ke ro.eñ āvāz deñge hū kī

sahrā meñ ghar hai merā ghar hai maqām hū kā

yaksāñ hai ḳhūñ-chakānī' yaksāñ hai ḳhūñ-fishānī

haiñ ek dīda-o-dil ye josh hai lahū kā

samjhe haiñ ḳhizr jis ko sahrā-navard-e-ulfat

naqsh-e-fanā vo ik hai vo pā-e-justujū kā

gardūñ habāb is meñ ġharq āftāb is meñ

dil kī bisāt kyā hai ek qatra hai lahū kā

kyuuñ itne ūñche jaa.eñ kyuuñ ulTī muñh kī khā.eñ

aatā hai apne muñh par jab āsmāñ kā thūkā

donoñ bahut haiñ nāzuk un nāznīñ butoñ se

allāh hai nigahbāñ īmān-o-ābrū kā

añgūr hī meñ utrā qismat kā āb-o-dāna

maiñ thā isī kā pyāsā maiñ thā isī kā bhūkā

maiñ ai 'riyāz' ḳhush huuñ ik boriyā hī maiñ huuñ

pahle jo zarf-e-mai thā ab zarf hai vuzū kā

munh zer-e-tak khola waiz bahut hi chuka

belon ne daDhi pakDi KHoshon ne munh mein thuka

kahta hai kyun anal-haq jo qatra hai lahu ka

munh khul gaya hai shayad meri rag-e-gulu ka

shoKHi jo barq ki hai garmi sharar ki hai

kuchh kah raha hai musa andaz-e-guftugu ka

dhona hai waqt-e-aKHir munh ki mujhe siyahi

ai ashk-e-sharm ab bhi mauqa hai shust-o-shu ka

kyun tifl-e-ashk lipTe ai dil na aastin se

parwarda hai ye mere daman-e-arzu ka

saqi bahaar dar-kaf phul aae mai-kade se

tufan uTh raha hai gulshan mein rang-o-bu ka

waiz tujhe KHabar hai mai-KHana kis ka ghar hai

KHum us ki pusht par hai khulwa na munh subu ka

mere badan ke roen aawaz denge hu ki

sahra mein ghar hai mera ghar hai maqam hu ka

yaksan hai KHun-chakani' yaksan hai KHun-fishani

hain ek dida-o-dil ye josh hai lahu ka

samjhe hain KHizr jis ko sahra-naward-e-ulfat

naqsh-e-fana wo ek hai wo pa-e-justuju ka

gardun habab is mein gharq aaftab is mein

dil ki bisat kya hai ek qatra hai lahu ka

kyun itne unche jaen kyun ulTi munh ki khaen

aata hai apne munh par jab aasman ka thuka

donon bahut hain nazuk un naznin buton se

allah hai nigahban iman-o-abru ka

angur hi mein utra qismat ka aab-o-dana

main tha isi ka pyasa main tha isi ka bhuka

main ai 'riyaz' KHush hun ek boriya hi main hun

pahle jo zarf-e-mai tha ab zarf hai wuzu ka