منحصر تم پہ ہے چاہو تو گلستاں کر دو

منحصر تم پہ ہے چاہو تو گلستاں کر دو

ورنہ چاہو تو مرے دل کو بیاباں کر دو

ہم نے اب تک نہ لیا سر پہ کسی کا احساں

تم اگر چاہو تو شرمندۂ احساں کر دو

دل کی دنیا مری ویران رہے گی کب تک

کچھ تو ہم خاک نشینوں کا بھی ساماں کر دو

خود ہی سوچو کہ ہے یہ بات قرین انصاف

خود رہو چین سے دنیا کو پریشاں کر دو

پھر کوئی طالب دیدار ہوا جلوہ طلب

مشعل طور کو پھر آج فروزاں کر دو

ابھی اک آن میں ہستی کا مٹے گا جھگڑا

دل کی اس آگ کو کچھ اور فروزاں کر دو

کون سنتا ہے غریبوں کی ذکیؔ دنیا میں

چاک پھر کیوں نہیں تم زیست کا داماں کر دو