munhasir tum pe hai chaho to gulistan kar do

munhasir tum pe hai chāho to gulistāñ kar do

varna chāho to mire dil ko bayābāñ kar do

ham ne ab tak na liyā sar pe kisī kā ehsāñ

tum agar chāho to sharminda-e-ehsāñ kar do

dil kī duniyā mirī vīrān rahegī kab tak

kuchh to ham ḳhāk-nashīnoñ kā bhī sāmāñ kar do

ḳhud hī socho ki hai ye baat qarīn-e-insāf

ḳhud raho chain se duniyā ko pareshāñ kar do

phir koī tālib-e-dīdār huā jalva-talab

mash.al-e-tūr ko phir aaj farozāñ kar do

abhī ik aan meñ hastī kā miTegā jhagḌā

dil kī is aag ko kuchh aur farozāñ kar do

kaun suntā hai ġharīboñ kī 'zakī' duniyā meñ

chaak phir kyoñ nahīñ tum ziist kā dāmāñ kar do

munhasir tum pe hai chaho to gulistan kar do

warna chaho to mere dil ko bayaban kar do

hum ne ab tak na liya sar pe kisi ka ehsan

tum agar chaho to sharminda-e-ehsan kar do

dil ki duniya meri viran rahegi kab tak

kuchh to hum KHak-nashinon ka bhi saman kar do

KHud hi socho ki hai ye baat qarin-e-insaf

KHud raho chain se duniya ko pareshan kar do

phir koi talib-e-didar hua jalwa-talab

mashal-e-tur ko phir aaj farozan kar do

abhi ek aan mein hasti ka miTega jhagDa

dil ki is aag ko kuchh aur farozan kar do

kaun sunta hai gharibon ki 'zaki' duniya mein

chaak phir kyon nahin tum zist ka daman kar do