munjamid the meri palkon ke kinare aansu

munjamid the mirī palkoñ ke kināre aañsū

bah ga.e aaj vo yādoñ ke sahāre aañsū

kyoñ ki apnoñ ne hī baḳhshe haiñ ye saare aañsū

is liye bhī hai hameñ jaan se pyāre aañsū

sāmne sab ke nikal aa.e nahīñ hai mumkin

itne kam-zarf nahīñ haiñ ye hamāre aañsū

mo'jiza aur bhalā is se baḌā kyā hogā

dard is dil meñ hai girte haiñ tumhāre aañsū

haa.e afsos jab āñkheñ hī nahīñ detīñ jagah

be-amāñ hote haiñ tab dard ke maare aañsū

kisī sūrat se bhī ḳhālī nahīñ jaane vaale

tere dar aa.e haiñ dāman ko pasāre aañsū

ik nayā zāviya aa.egā kahānī meñ agar

tere aañsū se jo mil jaa.eñ hamāre aañsū

muntazir dil hai ye armān saje haiñ is meñ

poñchh de aa ke inheñ raah nihāre aañsū

munjamid the meri palkon ke kinare aansu

bah gae aaj wo yaadon ke sahaare aansu

kyon ki apnon ne hi baKHshe hain ye sare aansu

is liye bhi hai hamein jaan se pyare aansu

samne sab ke nikal aae nahin hai mumkin

itne kam-zarf nahin hain ye hamare aansu

mo'jiza aur bhala is se baDa kya hoga

dard is dil mein hai girte hain tumhaare aansu

hae afsos jab aankhen hi nahin detin jagah

be-aman hote hain tab dard ke mare aansu

kisi surat se bhi KHali nahin jaane wale

tere dar aae hain daman ko pasare aansu

ek naya zawiya aaega kahani mein agar

tere aansu se jo mil jaen hamare aansu

muntazir dil hai ye arman saje hain is mein

ponchh de aa ke inhen rah nihaare aansu