munsif ho bhala hukm suna kyon nahin dete

munsif ho bhalā hukm sunā kyoñ nahīñ dete

mujrim huuñ agar maiñ to sazā kyoñ nahīñ dete

dīvār khaḌī ho ga.ī nafrat kī bahar-sū

arbāb-e-vafā is ko girā kyoñ nahīñ dete

vo ḳhūgar-e-dushnām jo aflāk-nashīñ haiñ

auqāt kabhī un kī batā kyoñ nahīñ dete

kuchh der ke hī vāste hogā to ujālā

in jhoñpaḌoñ meñ aag lagā kyoñ nahīñ dete

phir koī Tsunami kī sadā guuñj rahī hai

ḳhvābīda haiñ jo log jagā kyoñ nahīñ dete

raTtī rahī beTe kī judā.ī pe shab-o-roz

tum shakl zarā maañ ko dikhā kyoñ nahīñ dete

is se to faqat zaḳhm harā hotā hai 'anjum'

farsūda hikāyāt bhulā kyoñ nahīñ dete

munsif ho bhala hukm suna kyon nahin dete

mujrim hun agar main to saza kyon nahin dete

diwar khaDi ho gai nafrat ki bahar-su

arbab-e-wafa is ko gira kyon nahin dete

wo KHugar-e-dushnam jo aflak-nashin hain

auqat kabhi un ki bata kyon nahin dete

kuchh der ke hi waste hoga to ujala

in jhonpaDon mein aag laga kyon nahin dete

phir koi Tsunami ki sada gunj rahi hai

KHwabida hain jo log jaga kyon nahin dete

raTti rahi beTe ki judai pe shab-o-roz

tum shakl zara man ko dikha kyon nahin dete

is se to faqat zaKHm hara hota hai 'anjum'

farsuda hikayat bhula kyon nahin dete