aks ko qaid ki parchhain ko zanjir karen

aks ko qaid ki parchhā.īñ ko zanjīr kareñ

sā.at-e-hijr tujhe kaise jahāñgīr kareñ

paañv ke nīche koī shai hai zamīñ kī sūrat

chand din aur isī vahm kī tash.hīr kareñ

shahr-e-ummīd haqīqat meñ nahīñ ban saktā

to chalo us ko tasavvur hī meñ ta.amīr kareñ

ab to le de ke yahī kaam hai in āñkhoñ kā

jin ko dekhā nahīñ un ḳhvāboñ kī ta.abīr kareñ

ham meñ jur.at kī kamī kal kī tarah aaj bhī hai

tishnagī kis ke laboñ par tujhe tahrīr kareñ

umr kā baaqī safar karnā hai is shart ke saath

dhuup dekheñ to ise saa.e se ta.abīr kareñ

aks ko qaid ki parchhain ko zanjir karen

saat-e-hijr tujhe kaise jahangir karen

panw ke niche koi shai hai zamin ki surat

chand din aur isi wahm ki tashhir karen

shahr-e-ummid haqiqat mein nahin ban sakta

to chalo us ko tasawwur hi mein tamir karen

ab to le de ke yahi kaam hai in aankhon ka

jin ko dekha nahin un KHwabon ki tabir karen

hum mein jurat ki kami kal ki tarah aaj bhi hai

tishnagi kis ke labon par tujhe tahrir karen

umr ka baqi safar karna hai is shart ke sath

dhup dekhen to ise sae se tabir karen