ummid se kam chashm-e-KHaridar mein aae

ummīd se kam chashm-e-ḳharīdār meñ aa.e

ham log zarā der se bāzār meñ aa.e

sach ḳhud se bhī ye log nahīñ bolne vaale

ai ahl-e-junūñ tum yahāñ bekār meñ aa.e

ye aag havas kī hai jhulas degī ise bhī

sūraj se kaho sāya-e-dīvār meñ aa.e

baḌhtī hī chalī jaatī hai tanhā.ī hamārī

kyā soch ke ham vādī-e-inkār meñ aa.e

ummid se kam chashm-e-KHaridar mein aae

hum log zara der se bazar mein aae

sach KHud se bhi ye log nahin bolne wale

ai ahl-e-junun tum yahan bekar mein aae

ye aag hawas ki hai jhulas degi ise bhi

suraj se kaho saya-e-diwar mein aae

baDhti hi chali jati hai tanhai hamari

kya soch ke hum wadi-e-inkar mein aae