muntashir jab zehn mein lafzon ka shiraaza hua

muntashir jab zehn meñ lafzoñ kā shīrāza huā

mujh ko ik saada varaq ke dukh kā andāza huā

yuuñ to ik chubhtā huā ehsās thī us kī nazar

choT hī ubhrī na koī zaḳhm hī taaza huā

moḌnā chāhā thā maiñ ne sar-phire lamhoñ kā ruḳh

der meñ ujḌī huī shāḳhoñ ko andāza huā

apnī palkoñ par liye phirtā rahā nīñdoñ kā bojh

chand ḳhvāboñ kā adā mujh se na ḳhamyāza huā

nīchī dīvāroñ ke saa.e bhī baḌe hote nahīñ

aaj apne dostoñ se mil ke andāza huā

ḳhud se sharminda nazar ā.eñge saare aa.ine

phir kabhī yakjā agar chehroñ kā shīrāza huā

jab havā.eñ dī ga.ī 'ālam' mire iḳhlās ko

ek chehra thā jo apne aap be-ġhāza huā

muntashir jab zehn mein lafzon ka shiraaza hua

mujh ko ek sada waraq ke dukh ka andaza hua

yun to ek chubhta hua ehsas thi us ki nazar

choT hi ubhri na koi zaKHm hi taza hua

moDna chaha tha main ne sar-phire lamhon ka ruKH

der mein ujDi hui shaKHon ko andaza hua

apni palkon par liye phirta raha nindon ka bojh

chand KHwabon ka ada mujh se na KHamyaza hua

nichi diwaron ke sae bhi baDe hote nahin

aaj apne doston se mil ke andaza hua

KHud se sharminda nazar aaenge sare aaine

phir kabhi yakja agar chehron ka shiraaza hua

jab hawaen di gai 'alam' mere iKHlas ko

ek chehra tha jo apne aap be-ghaza hua