muntazir rahna bhi kya chahat ka KHamyaza nahin

muntazir rahnā bhī kyā chāhat kā ḳhamyāza nahīñ

kaan dastak par lage haiñ ghar kā darvāza nahīñ

haath par tū ne muqaddar kī lakīreñ khīñch diiñ

kyā tujhe bhī mere mustaqbil kā andāza nahīñ

dekhnā chāhūñ to ḳhushbū, chhūnā chāhūñ to havā

mere dāman tak jo aa.e tū vo shīrāza nahīñ

dafan huuñ ehsās kī sadiyoñ purānī qabr meñ

zindagī ik zaḳhm hai aur zaḳhm bhī taaza nahīñ

tum hī ai ḳhāmoshiyo patthar uThā lo haath meñ

koī naġhma koī naala koī āvāza nahīñ

husn pahchānegī merā dekhne vaalī nazar

ḳhuuñ to hai āñkhoñ meñ chehre par agar ġhāza nahīñ

māñgte haiñ kyuuñ 'muzaffar' log bārish kī duā

tishnagī-e-rūh kā jismoñ ko andāza nahīñ

muntazir rahna bhi kya chahat ka KHamyaza nahin

kan dastak par lage hain ghar ka darwaza nahin

hath par tu ne muqaddar ki lakiren khinch din

kya tujhe bhi mere mustaqbil ka andaza nahin

dekhna chahun to KHushbu, chhuna chahun to hawa

mere daman tak jo aae tu wo shiraaza nahin

dafan hun ehsas ki sadiyon purani qabr mein

zindagi ek zaKHm hai aur zaKHm bhi taza nahin

tum hi ai KHamoshiyo patthar uTha lo hath mein

koi naghma koi nala koi aawaza nahin

husn pahchanegi mera dekhne wali nazar

KHun to hai aankhon mein chehre par agar ghaza nahin

mangte hain kyun 'muzaffar' log barish ki dua

tishnagi-e-ruh ka jismon ko andaza nahin