muntazir tha ek muddat se zamana aap ka

muntazir thā ek muddat se zamāna aap kā

ḳhair-maqdam kyoñ na hotā vālihāna aap kā

chāñd taare kar rahe haiñ mad.h-ḳhvānī aap kī

lāla-o-gul kī zabāñ par hai tarāna aap kā

nuur ke sāñche meñ Dhal kar nuur phailāne lagīñ

jab paḌā tārīkiyoñ par tāziyāna aap kā

chāñd par paḌtī hai aaqā jab kabhī merī nazar

yaad aatā hai mujhe unglī uThānā aap kā

tab se phūloñ ko taqaddus kā labāda mil gayā

jab se dekhā gulsitāñ ne muskurānā aap kā

faiz paayā hai sabhī ne aap kī ta.alīm se

kyoñ na girvīda rahe saarā zamāna aap kā

rauza-e-aqdas pe aakar kyoñ na Thahreñ qāfile

bā.is-e-taskīn-e-dil hai āstāna aap kā

aap ke ghar se chalā hai inkisārī kā chalan

sab se aalī sab se afzal hai gharānā aap kā

apne bandoñ par hai kitnā mehrbāñ rabb-e-karīm

ik subūt is kā hai rahmat ban ke aanā aap kā

dekhtā rahtā hai hasrat se zamīñ ko āsmāñ

mamba.a-e-anvār-e-rahmat hai Thikāna aap kā

hukmrānī aap ne kī boriye par baiTh kar

ḳhuub thā andāz aaqā ḳhusravāna aap kā

hai 'shakīl-ibn-e-sharaf' ke dil meñ bas ye aarzū

hashr meñ duniyā kahe is ko divāna aap kā

muntazir tha ek muddat se zamana aap ka

KHair-maqdam kyon na hota walihana aap ka

chand tare kar rahe hain madh-KHwani aap ki

lala-o-gul ki zaban par hai tarana aap ka

nur ke sanche mein Dhal kar nur phailane lagin

jab paDa tarikiyon par taziyana aap ka

chand par paDti hai aaqa jab kabhi meri nazar

yaad aata hai mujhe ungli uThana aap ka

tab se phulon ko taqaddus ka labaada mil gaya

jab se dekha gulsitan ne muskurana aap ka

faiz paya hai sabhi ne aap ki talim se

kyon na girwida rahe sara zamana aap ka

rauza-e-aqdas pe aakar kyon na Thahren qafile

bais-e-taskin-e-dil hai aastana aap ka

aap ke ghar se chala hai inkisari ka chalan

sab se aali sab se afzal hai gharana aap ka

apne bandon par hai kitna mehrban rabb-e-karim

ek subut is ka hai rahmat ban ke aana aap ka

dekhta rahta hai hasrat se zamin ko aasman

mamba-e-anwar-e-rahmat hai Thikana aap ka

hukmrani aap ne ki boriye par baiTh kar

KHub tha andaz aaqa KHusrawana aap ka

hai 'shakil-ibn-e-sharaf' ke dil mein bas ye aarzu

hashr mein duniya kahe is ko diwana aap ka